المفتول الفلسطيني

[بنوتة كيوت lole]

جزء كبير من كلمات النص بالنكهة العامية الفلسطينية بدكم تتحملوني

حكي فاضي ..!!

ما في أزكى من أكل الأم

لو كبرنا وسافرنا وتغربنا وتزوجنا وتركنا بيوت أمهاتنا رح نظل نحن لأكلهن ولأيامهن ، فدرويش لم ينس خبز وقهوة أمه طوال سنوات منفاه وغربته وفي كل مناسبة كان يردد قصيدته الجميلة ” احن إل خبز أمي ..” حتى حفظها العالم وأصبحت نشيداً وطنياً ، حال درويش حال الكثيرين منا فأنا مثلاً تغربت ببداية شبابي وتزوجت بعد ذلك ولا زلتُ أحن لأكل الوالدة أطال الله بعمرها ..

كنت قبل يومين عند صديقي أبو الصابر وحدثني عن قصته مع مفتولات زوجته ، ولن أبخل عليكم بها ما دام حديثنا عن المفتول الفلسطيني..

اشتهى أبو الصابر أكلة مفتول فطلبها من زوجته أم الصابر ..

المسكينة ما حبت تخيب ظنه فيها و تقولو ما بعرف اعملها . وقلتلو يومها :

ولا يهمك يا أبو الصابر بكره غداك مفتول من أيدين حبيبتك أم الصابر ..

جاء بكره ويومها ما افطر أبو الصابر وهو عم بستنى بمفتولات أم الصابر

معدة ابو الصابر عم بتطرق وبتسعجل بالغداء

وضعت أم الصابر مفتولاتها ، وشمر أبو الصابر عن أيديه وجهز اكبر معلقة لاقها بالمطبخ – تقولوا مغرفة - وقبل ما ينزل طحن ، جلس يتأمل بطبق المفتول المزركش بالحمص والجزر واللحم واللوز ويقول بعقله منين بدي أوكلك يا مفتولتي ..!!

ملعقة واحدة كانت كفيلة بإيقاظ أبو الصابر من أحلامه المفتوليه وتذكره انه بحضرة ام الصابر مو بحضرة والدته الشهيرة بعمل المفتول

فشتان بين بنات الميكروف والفول اتوماتيك وكل شيء جاهز وبين بنات الطوابين والطبخ والنفخ على النار

اتضح لابو الصابر أنهن مفتولات أم الصابر من المفتول الجاهز يلي بيبعوا بالدكاكين ويلي ببيصنعوا من الطحين الأبيض وطعمه بيختلف اختلاف كلي عن طعم المفتول البلدي المصنوع من طحين القمح البلدي الأسمر ..

قرر أبو الصابر أنه يصطحب أم الصابر لبيت والدته لحتى تتعلم عمل المفتول الفلسطيني على اصواله

وعلى رأي المثل

أعطي الخبز لخبازه حتى لو أكل نصفه

وما رح ابخل عليكم جيران الأعزاء بجولة مصورة مع مفتولات الوالدة “ أم سامح “ أطال الله بعمرها وهي تنافس أم الصابر بعمل المفتول الفلسطيني :



بنجيب الطحينات “ طبعاً طحين بلدي اسمر “



بنحضر المفتوليه ،ويلي ما بعرفها يسأل عنها



وهذا البرغل المنقوع بالماء



نضعه “اي البرغول” بسطل المفتول



ونبدأ باضافة الطحين عليه والفلّ



ولا زالت ام سامح بتفل بالمفتول



بعدها بنحضر الكمدة وهي بقدونس ونعناع وبصل وبهارات تعطي النكه للمفتول



ولا تنسوا اضافة زيت الزيتون للكمدة



وهلاء جهزت الكمدة



بنضيفها على المفتول يلي بالمفتوليه



قبل ما نحط المفتوليه بالمفتول على بخار الماء علينا اضافة قطعة حامض للماء يلي بالطنجرة حتى ما تسمر ” تسود ” الطنجرة


واتفتل على راحتك يا مفتول

طبعاً بينضاف الو مرقة ” شوربة ” حمرا اضافة للحم والحمص واللوز والجزر وووو حسب زوقكم وصحتين ومليون عافية



(كل مفتول ووتطلع مسطول)
تحياتي لكم