الكبة المقلية والكبة اللبنية يمي يمي

بيلساان · رقم المشاركة : ( 1 )

مرحبا بحلوات منتدى الاسلام و السنة

عملت كبة وطلعت يم يم نجحت من بعد عدة محاولات

هي مو صعبة بس فيها شغل كتير حاولت اني اصور واشرح خطوة خطوة

اول شي مقادير العجينة كلها

برغل ابيض ناعم - ولحم - رشة طحين
الكميات هي مقدارين للبرغل مقدار للحم يعني لو استخدمتي كيلو برغل لازم نص كيلو لحم
وبتختاري الكمية على حسب عائلتك
يعني بما اني انا وزوجي بس وصعب علي اعرف الكيلو والنص كيلو بستخدم الكوب
يعني حطيت 2 كوب برغل 1 كوب لحم تقريبا والكمية لو اقل بشوي او اكتر عادي

اغسلي البرغل واتركي بوعاء على جنب حتى ينتقع لما تغسي صفي منو الماء لانو الماء الي بقيت فيه من الغسيل كافية انو ينتقع (كتيييييير ضروري هالشي مالازم يطلع ابدا في ماء زايد لازم يكون ناشف )
وبعد عشر دقايق او ربع ساعة ( على حسب الكمية ممكن تكون ساعة ) دوقيه ولو شفتي انو انتقع منيح يعني نبدا
حطي اللحم فوق البرغل وافرمي بالفرامة اختاري الوسط لاتختاري الصغير

ورح يطلعو بهالشكل

بعدين ابدي اعجنيها بايدك وحطي عليها رشة طحين وملح متل الصورة

لو حبيتي تحطي بهارات عادي بس هي طعمها الاصلي بدون بهارات

وهيك خلصنا العجين اهممممممم شي غطيها لاتخليها تنشف ابدا

نجي للحشو

بصلة كبيرة مفرومة ناعم او بصلتين وسط - كمية لحم تقريبا ضعف الكمية الي استخدمناها للعجين يعني هو تقريبا حتى ما ينقص حشو - جوز مقطع وسط - صنوبر - دبس رمان - رمان (مو ضروري )- ملح

نحمس البصل ولما بصير شفاف نضيف اللحم ووطي النار وغطيه حتى يستوي
ولما يستوي اللحم ضيفي الجوز والصنوبر

وحركي شوي وطفي النار

وضيفي دبس الرمان والرمان ولو بتحبي اي بهارات عادي حطي بس مايكون حار
انا ماحطيت ابدا لانو ابني صغير وحبيت انو ياكل معنا

الشكل النهائي للحشوة

نجي للشغل الحقيقي

كيف نشكل اقراص
الكبة
بعد مانحشيها وهي كانت اكبر مشكلة عندي بس الحمدلله بقدرة قادر تعلمت

رح حاول اشرحلكن

اول شي لازم عند كل وحدة تبللي ايدك حطي ماء جنبك متل الصورة

خدي جزء من العجين كوريها واعمليها بهالشكل

بعدين حطي فيها من الحشوة

وسكريها حاولي تسكريها بالاصبعين الابهام والسبابة بعد ما تبللي ايدك بالماء

ورح تصير متل هيك

وكملي لحد ما تخلصي كل العجين

يعني هو الشكل مو بيرفكت بس ماشي الحال
وطبعا لاتخليه مكشوف غطيه بين ماتخلصي كل الشغل الباقي

نجي للكبة المقلية وهي بسيطة بس لازم تنتبهي

اول شي حطي زيت تقريبا انو يغمر الكبة وحميه ع النار

ولاتحطي ولا واحد الا لما تتأكدي انو صار حامي ع الاخر لانو لو كان بارد شوي رح تفرط الكبة وتخرب

وحطي واحد واستني لاتحطيهم ورا بعض ستني شوي بعد كل واحد لانو الزيت بيبرد

طلعيها لما يكون لونها اغمق من الدهبي بشوي
وخلصنا من الكبة المقلية

الكبة اللبنية

طبعا رح نكون خلينا جزء من الاقراص للكبة
اللبنية
ونجهزها بهالشكل

طبعا نفتحها حتى يدخل عليها الروب

واهم شي انك تزبطي اللبن ( الروب )
والمقادير

روب تقريبا كوبين ونص - ملعقتين نشا - ملح

ماما بتقول اخلطيهم بالخلاط قبل ماتبدي بطبخهم بس انا جربت وحسيت انو الخلاط لايغني عن التكتل لو ما انتبهتي بالطبخ فما حطيتو بالخلاط

شغلي النار وحركي بخفة وما توقفي ابدا ولا تغيري اتجاه التحريك لانو رح يخرب

لحتى يبدا يغلي وطي النار وطبعا رح يكون جامد شوي

ضيفي ماء شوي وخليه يغلي شوي

وهو بيغلي ابدي ضيفي
الكبة
ووطي النار وغطيها لحد ما تستوي

(( ليصلك كل جديد أرسل الرقم 1 الى - 81428 للإتصالات السعودية - 601428 لموبايلي - 701428 زين ))

ممكن تدوقيها لتعرفي استوت ولا لاء وكمان بتصير شوي قاسية هي مارح تحتاج اكتر من نص ساعة

وسكري وووبس

شورية العدس

بسوريا هي الشورية لالالازم تكون موجودة مع
الكبة
وهي بسيطة

كوب عدس - نص كوب رز - كمية كبيرة ماء لانو رح تنشف - وممكن تضيفي لحم او لو عندك عظم بس ما تكتري لانو رح يطلع دسم كتير

اتركيها تغلي فترة طويلة يعني اكتر من ساعة على نار هادية لحد ماتصير بهالشكل

وهيك خلصت طبختي وهي النتائج